055 213 76 73
“Prezidentin bu gün imzaladığı fərmanda maraqlı bir məqam var”.
BAKU.WS xəbər verir ki, bu barədə Milli İnternet Forumunun prezidenti Osman Gündüz “Facebook” səhifəsində yazıb.
“Fərmana görə NK bir ay müddətində bütün dövlət qurumu və dövlət şirkətlərində, hətta publik qurumlarda xidməti avtomobil ilə təmin edilməli olan bütün vəzifələrin siyahısını hazırlamalıdır.
Bu yeni siyahıdan kənar olan bütün xidməti maşınlar Fərmanın tələbinə əsasən dərhal özəlləşdirilməyə çıxarılmalıdır”, - deyə forum rəhbəri bildirib.
O.Gündüz deyir ki, bir neçə gün öncə Ekologiya Nazirliyinin Tullantılarla məşğul olan qurumu büdcə vəsaiti hesabına 140 000 manatlıq “Land Cruiser”, bir dövlət universiteti 116 000 manatlıq “Toyota Avalon” markalı avtomobillər almışdı.
Bir iki gün öncə daha bir publik qurum da 1.4 milyona bir neçə maşın almışdı”.
O,Gündüz deyir ki, bu tam doğru və yerində verilən qərardır:
“Görünür bu tip addımlar ali hakimiyyəti lap hövsələdən çıxarıb. Tam doğru yanaşmadır. Gözləmək olar ki yaxın 2-3 ayda özəlləşdirməyə xeyli komfort maşınlar çıxarılacaq”.
Qeyd edək ki, ötən gün Azərbaycan Respublikası Prezidenti İlham Əliyev Azərbaycanda bir sıra dövlət orqanlarının strukturunun optimallaşdırılması və idarə edilməsinin təkmilləşdirilməsi ilə bağlı əlavə tədbirlər haqqında fərman imzalayıb.
Fərmanda bildirilir:
8.7.1. mərkəzi və yerli icra hakimiyyəti orqanlarında, dövlət adından yaradılan publik hüquqi şəxslərdə və səhmlərinin (paylarının) nəzarət zərfi dövlətə məxsus olan hüquqi şəxslərdə xidməti nəqliyyat vasitələri ilə təmin edilməli vəzifələrin siyahısını Azərbaycan Respublikasının Prezidenti ilə razılaşdırmaqla müəyyən etsin;
8.7.2. bu Fərmanın 8.7.1-ci yarımbəndinə əsasən müəyyən olunacaq siyahıdan kənarda qalan vəzifələrdə işləyən şəxslərə xidmət edən xidməti nəqliyyat vasitələrinin mərkəzi və yerli icra hakimiyyəti orqanlarının, dövlət adından yaradılan publik hüquqi şəxslərin və səhmlərinin (paylarının) nəzarət zərfi dövlətə məxsus olan hüquqi şəxslərin balanslarından çıxarılaraq özəlləşdirilməsi üçün Azərbaycan Respublikasının Əmlak Məsələləri Dövlət Komitəsinə təqdim edilməsini təmin etsin və nəticəsi barədə Azərbaycan Respublikasının Prezidentinə məlumat versin.
BAKU.WS