Azərbaycan baş nazirinin keçmiş müşaviri Musa Məmmədovun kürəkəni, türkiyəli iş adamı Mustafa Erkin Karamana silahlı hücum olub.
BAKU.WS Türkiyə KİV-nə istinadən xəbər verir ki, iş adamı İstanbulda Beykoz ərazisində lüks avtomobilində atəşə tutulub.
Dünən axşam 20.00 radələrində baş verən hadisədə 5 güllə atılıb. Onlardan 2-si ona dəyib.
Məlumata görə, biznesmen ərazidən yaralı halda uzaqlaşıb, daha sonra təcili yardım vasitəsilə xəstəxanaya yerləşdirilib.
Hadisə yerinə çoxsayda polis cəlb edilib və araşdırmalara başlanılıb. Cinayəti törədən 2 nəfər gecə saatlarında saxlanılıb.
Onlar ilkin dindirilmədə cinayəti 1 tapança və 2 ov tüfəngi ilə törətdiklərini etiraf ediblər.
Qeyd edək ki, Mustafa Erkin Karaman 2012-ci ildə Musa Məmmədovun qızı Günel Məmmədova ilə evlənib.
BAKU.WS